ප්රවාහන අපහසුතා හේතුවෙන් ගුරුවරුන්ගේ ඉල්ලීම සලකා බලා පහසු පාසල් වෙත තාවකාලික සේවා අනුයුක්ත ලබාදීමට අධ්යාපන අමාත්යාංශය තීරණය කර ඇත.
ඒ අනුව අධ්යාපන අමාත්යාංශය ලේකම් එම්.එන්.රණසිංහ මහතාගේ අත්සනින් යුතුව නව චක්රලේඛයක් නිකුත් කර තිබෙනවා.
මේ හරහා එකම පළාත තුළ ඇති ජාතික පාසල් අතර සහ ජාතික පාසල් හා පළාත් පාසල් අතර ගුරුවරුන් අනුයුක්ත කිරීම සඳහා අදාළ පළාත් අධ්යාපන අධ්යක්ෂවරයා වෙත බලය පවරා තිබෙනවා.
මෙම සියලු අනුයුක්ත කිරීම් 2022.12.31 වනදා දක්වා පමණක් ක්රියාත්මක වන අතර පාසල්වල ඉගෙනුම් ඉගැන්වීම් ක්රියාවලියට බාධාවක් නොවන පරිදි අදාළ පාසල් දෙකේ විදුහල්පතිවරුන්ගේ ලිඛිත එකඟතාව මත පමණක් සිදු කළ යුතු බව චක්රලේඛයේ වැඩිදුරටත් සඳහන් වෙයි.
අනුයුක්ත කොන්දේසි,
ඉල්ලීම් කරනු ලබන ගුරුවරුන් අදාළ පාසලේ අතිරික්ත නම්, ඔහු හෝ ඇය වෙනුවෙන් අනුප්රාප්තිකයෙකු ලබාදීමේ අවශ්යතාවයක් නොමැත.ඉල්ලීම් කරනු ලබන ගුරුවරුන් පාසලේ අතිරික්ත නොවේ නම්, සුදුසු අනුප්රාප්තිකයෙකු ලබාදීමෙන් පසුව අනුයුක්ත කිරීම සිදු කළ යුතුය.
විදුහල්පතිවරුන්ගේ එකඟතාවය මත සුහද ස්ථාන මාරුවීම් සිදුකරන ආකාරයටම එම පදනම මත සිදුකරන අනුයුක්ත කිරීම් ද සලකාබැලිය යුතුවෙයි.
ගර්භණීභාවය මත හා වෛද්ය නිර්දේශ මත සිදුකරනු බලන අනුයුක්ත කිරීම් අදාළ වෛද්ය සහතික මගින් සනාථ කරගනිමින් සිදුකළ යුතුය. (2007/20 චක්රලේඛයේ 3.4.II අනුව)
පළාත් අධ්යාපන අධ්යක්ෂ මගින් ජාතික පාසල් සම්බන්ධයෙන් සිදුකරනු ලබන අනුයුක්ත කිරීම්වල ලිපි පිටපත් අධ්යාපන අමාත්යාංශයේ අධ්යාපන අධ්යක්ෂ (ගුරු ස්ථාන මාරු) වෙත යොමු කළ යුතුය.
මෙම අනුයුක්ත කිරීම් 2022.12.31 දින දක්වා පමණක් ක්රියාත්මක වනපරිදි සිදුකළ යුතුවෙයි.
තවද මෙම අනුයුක්ත කිරීම අදාළ පාසල වෙත ස්ථාන මාරුවක් ලැබීම සඳහා හිමිකමක් නොවන අතර එම අනුයුක්ත කාලසීමාවේදී ගුරුවරුන්ගේ වැටුප් නිත්ය සේවා ස්ථානයෙන් ගෙවිය යුතුය.
අපගේ WhatsApp පුවත් සේවාවට එක්වී මෙවැනි පුවත් ඔබ අතටම ලබාගන්න.
