බස්නාහිර පළාතේ ප්‍රදේශ කිහිපයක් තවදුරටත් හුදකලා කර ඇති අතර, බස් රථ ධාවනය වන්නේ ඉතා අවම වශයෙන්. කොවිඩ් තත්ත්වය හේතුවෙන් දිවයිනේ බොහෝ ප්‍රදේශවල පුද්ගලයින් පොදු ප්‍රවාහනය භාවිත නොකිරීම නිසා දෛනිකව රුපියල් මිලියන 50 ක පමණ පාඩුවක් සිදුවන බව ලංකා ගමනාගමන මණ්ඩලය ප්‍රකාශ කළා. ඒ අනුව කොවිඩ් 19 දෙවන රැල්ල හේතුවෙන් මේ වනවිට ලංකා ගමනාගමන මණ්ඩලයට සිදුව ඇති පාඩුව අවම වශයෙන් මිලියන 520 ඉක්මවනවා.මේ අතර ලංගම බස් රථවල විෂබීජනාශක දියර සහිත බෝතල් සවි කිරීම සම්බන්ධයෙන් ලංකා ඛනිජ තෙල් සංස්ථාව සමඟ මේ වනවිටත් සාකච්ඡා පවත්වා ඇති බව එහි සභාපති කිංස්ලි රණවක ප්‍රකාශ කළා. ඒ අනුව දිවයින පුරා ධාවනය වන බස් රථ 4,000 ක් සඳහා විෂබීජනාශක දියර බෝතල් ඉදිරියේදී සවි කිරීමට කටයුතු කරනු ඇති.එමෙන්ම හෙට සහ අනිද්දා බස් ධාවනය කළ යුතු ආකාරය පිළිබඳව විශේෂ සාකච්ඡාවක් අද පවත්වන බව ශ්‍රී ලංකා ගමනාගමන මණ්ඩලය ප්‍රකාශ කළා.එමෙන්ම මෙම දින දෙකෙහි මගී දුම්රිය ධාවනය නොකිරිමට දුම්රිය දෙපාර්තමේන්තුව තීරණය කර තිබෙනවා.
