ලබන 20 වන දා අලුතෙන් තේරී පත්වූ ජෝ බයිඩ්න් වෙත බලය පවරා දීමට තමා සූදානම් බව ඇමරිකානු ජනාධිපති ඩොනල්ඩ් ට්‍රම්ප් ප්‍රකාශ කළා. කොංග්‍රස් මණ්ඩලය ජෝ බයිඩ්න්ගේ ජයග්‍රහණය අද තහවුරු කළා. එම දැනුම් දීමෙන් පසු සමාජ මාධ්‍ය සියල්ල අවහිර කර තිබූ පසුබිමක ජනාධිපති ඩොනල්ඩ් ට්‍රම්ප් බලය පවරා දීමට සූදානම් බව ප්‍රකාශ කළේ නිවේදනයක් නිකුත් කරමින්. කෙසේ වෙතත් ජනාධිපතිවරණ ප්‍රතිඵල සමඟ එකඟ නොවන බව ඔහු එහිදීත් සඳහන් කර තිබෙනවා. මේ අතර ලෝක බලවතුන්ද මෙම සිදුවීම සම්බන්ධයෙන් සහ ට්‍රම්ප් පරිපාලනය විවේචනය කර තිබෙනවා. ඒ අතරට ඉන්දීය අගමැති නරේන්ද්‍ර මෝදි, ජගත් සංවිධානයේ මහ ලේකම් ඇන්ටෝනියෝ ගුටේර්ස්ල බ්‍රිතාන්‍ය අගමැති බොරිස් ජොන්සන්, ජර්මන් චාන්සලර්ඇන්ජලා මර්කර් ඇතුළු පිරිසක් අයත්. ඊයේ ඩොනල්ඩ් ට්‍රම්ප්ගේ ආධාරකරුවන් සෙනෙට් සභා ගොඩනැගිල්ලට කඩා වැදීම හේතුවෙන් ඇති වූ නොසන්සුන්කාරී තත්ත්වයත් සමඟ ඇති වූ ප්‍රචණ්ඩක්‍රියාවලින් සිව් දෙනෙකු ජීවිතක්ෂයට පත්වුණා.
