එක්ස්ප්‍රස් පර්ල් විමර්ශනයට නාවික හමුදාව සහ වෙරළාරක්ෂක දෙපාර්තමේන්තුව

  කොළඹ වරායට වයඹ දෙසින් නාවික සැතපුම් 9.5 ක් දුර මුහුදේ නැංගුරම් ලා තිබියදී ගිනි ගැනීමක් හේතුවෙන් අනතුරට පත් එක්ස්ප්‍රස් පර්ල් නෞකාව පිහිටි මුහුදු ප්‍රදේශය වෙත අනතුර සම්බන්ධයෙන් ඉදිරි විමර්ශන කටයුතු සිදු කිරීමට රජයේ විමර්ශන කණ්ඩායමක් ශ්‍රී ලංකා වෙරළාරක්ෂක දෙපාර්තමේන්තුවට අයත් "සමුද්‍රාරක්ෂා" නෞකාව මගින් රැගෙන ඒමට කටයුතු කර තිබේ.

එක්ස්ප්‍රස් පර්ල් නෞකාව  ගිනි ගැනීම හේතුවෙන් සාගර පරිසරයට සිදු වී ඇති බලපෑම සොයා බැලීම සඳහා මුහුදු ජන නියැදින් ලබාගැනීම සහ ස්ථානයේ නිරීක්ෂණ කටයුතු සිදු කිරීම සඳහා, විමර්ශන කණ්ඩායමක් නෞකාව පිහිටි මුහුදු ප්‍රදේශයට රැගෙන යාමට පහසුකම් සලසන මෙන් අපරාධ පරීක්ෂණ දෙපාර්තමේන්තුව මගින් නාවික හමුදාවෙන් ඉල්ලීමක් සිදු කළ අතර ඒ අනුව අනතුර සම්බන්ධව ඉදිරි විමර්ශන කටයුතු සිදු කරනු ලබන රජයේ රස පරීක්ෂක දෙපාර්තමේන්තුවේ විශේෂඥ නිලධාරීන් ගෙන් යුත් දාහතර දෙනෙකුගෙන් සමන්විත මෙම කණ්ඩායම ශ්‍රී ලංකා වෙරළාරක්ෂක දෙපාර්තමේන්තුවට අයත් "සමුද්‍රාරක්ෂා" නෞකාව මගින් නාවික හමුදාව රැගෙන ගොස් තිබේ.