රජයේ වෛද්‍ය නිලධාරීන්ගේ සංගමයට එරෙහිව වෛද්‍ය ජයරුවන් බණ්ඩාර, ජනාධිපති නීතිඥ උපුල් ජයසූරිය , නීතිඥ සම්පත් විජේවර්ධන ඇතුළු නීතිඥ කණ්ඩායමක් මගින් මොරටුව දිසා අධිකරණට ඊයේ (22 වැනිදා) පැමිණිල්ලක් යොමු කර තිබෙනවා.
ඒ් එම සංගමයේ ව්‍යවස්ථාවේ අතිරේකයේ ප්‍රතිපාදන අනුව අතුරු කමිටුවක් පත් කිරීමෙන් තොරව නිලවරණය පැවැත්වීමෙන් එහි නියෝජිතයන් සහ එම සංගමයේ අධිකාරිය මත කටයුතු කිරීම වළකාලමින් අතුරු තහනම් නියෝගයක් (ආඥාවක්) ලබා දෙන තෙක් දින 14 කාලයකට බලපැවැත්වෙන පරිදි වාරණ නියෝගයක් ඉල්ලමිනුයි.
ඒ අනුව මොරටුව ප්‍රධාන මහේස්ත්‍රාත් , දිසා විනිසුරු දමින්ද රාමණායක මහතා විසින් ඊයේ (22) අතුරු තහනම් නියෝගයක් ලබා දෙන තෙක් දින 14ක කාලයකට බලපැවැත්වෙන පරිදි වාරණ නියෝගය ලබා දී ඇත.
එම විත්තිකාර සංගමය වර්ෂ 2020 ජූනි මසදී පැවති මහ සභා රැස්වීමේදී පත් කරන ලද නිලවරණ කමිටුවේ සහ මධ්‍යම කාරක සභාවේ හිටපු නිලධාරීන් වර්ෂ 2021 ජූනි මාසයෙන් පසුව තවදුරටත් එම සංගමයේ ධූරයෙහි කටයුතු කිරීම සහ ධුරයේ නමින් පෙනී සිටීම වළක්වාලනු ලබන අතුරු තහනම් නියෝගයක් ලබා දෙන තෙක් බලපැවැත්වෙන පරිදි සහ 2020 ජූනි මසදී පැවති මහා සභා රැස්වීමේදී පත් කරන ලද විධායක සභාවේ හිටපු නිළධාරීන් වර්ෂ 2021 ජූනි මාසයෙන් පසුව තවදුරටත් සංගමයේ ධුරයන්හි කටයුතු කිරීම , ධූරයේ නමින් පෙනී සිටීම වළක්වාලනු ලබන අතුරු තහනම් නියෝගයක් ලබා දෙන ලෙස මෙන්ම අළුතින් නාමයෝජනා කැඳවීමකින් තොරව සංගමයේ නිළවරණය පැවැත්වීමෙන් රජයේ වෛද්‍ය නිලධාරීන්ගේ සංගමයේ නියෝජිතයන් සහ අධිකාරිය මත කටයුතු කරන සියළු දෙනාම වළක්වාලනු ලබන අතුරු තහනම් නියෝගයක් ලබා දෙන තෙක් දින 14ක කාලයකට බලපැවැත්වෙන පරිදි වූ වාරණ නියෝගයක් ලබා දෙන ලෙස ඉල්ලා තිබුණි.
ඒ අනුව මොරටුව ප්‍රධාන මහේස්ත්‍රාත්, දිසා විනිසුරු දමින්ද රාමණායක මහතා විසින් ඊයේ (22) මෙම වාරණ නියෝගය ලබා දුන් බව වෛද්‍ය ජයරුවන් බණ්ඩාර වෙනුවෙන් පෙනී සිටි නීතිඥ කණ්ඩායම පැවසීය.
වෛද්‍ය ජයරුවන් බණ්ඩාර රජයේ වෛද්‍ය නිලධාරීන්ගේ සංගමයට නාමයෝජනා භාර දී තිබූ අතර එයද එම සංගමය ප්‍රතික්ෂේප කර තිබෙනවා..
