රජයේ පාලන මිලට සහල් අලෙවි නොකරන මහා පරිමාණ වී මෝල් හිමියන් සතු සහල් හදිසි නීති රෙගුලාසි යටතේ රජයට පවරාගෙන පාලන මිලට වෙළඳපොලට නිකුත් කරන ලෙස ජනාධිපතිවරයා වෙළෙඳ අමාත්‍ය බන්දුල ගුණවර්ධන මහතාට උපදෙස් දී තිබෙනවා.
සහල් සඳහා රජයේ පාලන මිලක් නියම කළ ද වෙළෙඳ පොළේ සහල් මිල අඩු වී නැති බව කැබිනට් රැස්වීමේ දී අමාත්‍යවරුන් විසින් ජනාධිපතිවරයාට පෙන්වා දීමෙන් පසු මෙම තීරණය ගෙන ඇත.
සුදු සහ රතු කැකුළු කිලෝවක් සඳහා රුපියල් 95ක් ද නාඩු කිලෝවක් රුපියල් 98ක් ද සම්බා කිලෝවක් රුපියල් 103කට ද කීරි සම්බා කිලෝවක් රුපියල් 125 ක් ද වශයෙන් උපරිම සිල්ලර මිලක් රජය විසින් පසුගියදා පනවනු ලැබුවා.
මෙහිදී ජනාධිපතිවරයා වැඩිදුරටත් පවසා ඇත්තේ රජයේ පාලන මිලට සහල් අලෙවි නොකරන මහා පරිමාණ වී මෝල් හිමියන්ගේ සහල් සහතික මිලට මිලදී ගෙන කුඩා පරිමාණ වී මෝල් හිමියන් හරහා සහල් කර අලෙවි කරන ලෙසයි.
මේ අතර කොළඹ දිස්ත්‍රික් ලේකම්වරයා සහ පාරිභෝගික කටයුතු අධිකාරියේ නිලධාරීන් විසින් පිටකොටුව තොග වෙළෙඳ සල්වල සිදුකළ හදිසි වැටලීමකින් වැඩි මිලට අලෙවි කළ සහල් කිලෝ 14,000ක් සතොසට පවරාගෙන තිබෙනවා.
අපගේ WhatsApp පුවත් සේවාවට එක්වී මෙවැනි පුවත් ඔබ අතටම ලබාගන්න.
