කොරෝනා රෝගය වැළඳී මිය ගිය භාරකරුවකු නොමැති පුද්ගලයකුගේ මළ සිරුරක් දින විසිපහක් තිස්සේ හෝමාගම මූලික රෝහලේ මෘත ශරීරාගාරයේ තැන්පත් කර ඇති බව හෝමාගම මූලික රෝහල් පොලීසිය පවසනවා.
මේ හේතුවෙන් ශීතකරණ හයකින් යුක්ත මෘත ශරීරාගාරයේ දෛනිකව සිදුවන මරණ වලට අදාළ මෘත දේහ තැන්පත් කිරීමට පවා බාධා එල්ල වී තිබෙන ද වාර්තා වනවා.
පෑලියගොඩ ප්‍රදේශයේ මහමග රෝගීව රැදී සිටි මෙම පුද්ගලයා පසුගිය 05 දා 1990 සුවසැරිය ගිලන් රථයකින් කොළඹ ජාතික රෝහලට ඇතුළත් කර තිබෙනවා.
පසුව සිදු කරන ලද PCR පරීක්ෂණයකදී ඔහුට කොරෝනා වෛරසය වැළඳී ඇති බවට තහවුරු වීමත් සමග ප්‍රතිකාර සඳහා හෝමාගම මූලික රෝහලට ඇතුළත් කර තිබූ අතර එහි ප්‍රතිකාර ලබමින් සිටියදී පසුගිය 07 දා මෙසේ මියගොස් තිබෙනවා.
ඒ අනුව මියගිය පුද්ගලයා පසුගිය 07 දා සහ 12 දා PCR පරීක්ෂණ වලට ලක් කර ඇති අතර ඒ අවස්ථා දෙකේ දී ද ඔහුගේ සිරුරේ වෛරසය රැඳී තිබූ බවටයි තහවුරු වී ඇත්තේ.
මෙම පුද්ගලයා රෝහලට ඇතුළත් කරන අවස්ථාවේදී ඔහුගේ අනන්‍යතාවය ඇතුළත් කිසිඳු තොරතුරක් රෝහලට ලැබි නොතිබීම හේතුවෙන් මෘත දේහය පිළිබඳව අවසන් කටයුතු සිදුකිරීමට බාධා එල්ලවීම නිසා දින 25ක් තිස්සේ එම දේහය මෘත ශරීරාගාරයේ තැන්පත් කර තැබීමට සිදුව ඇතැයි පැවසෙනවා.
වයස අවුරුදු (62) පමණ වන මෙම පුද්ගලයාගේ ඇඳ ඉහපත් ලේඛනයේ යාචකයෙකු ලෙස සටහන්ව ඇති බවයි වාර්තා වන්නේ.
මේ අනුව මෙම පුද්ගලයාගේ මෘත දේහය පිළිබඳ අවසන් කටයුතු ඉතා ඉක්මනින් සිදු කළ යුතු නිසා භාරකරුවෙකු වෙතොත් හැකි ඉක්මනින් හෝමාගම රෝහල් පොලීසිය අමතා තොරතුරු ලබා දෙන ලෙස ජනතාවගෙන් ඉල්ලා සිටිනවා.
