ගිනිගනිමින් පවතින එක්ස්ප්‍රස් පර්ල් නෞකාවේ සුන්බුන් මීගමුව අවට වෙරළ තීරයට ගසාගෙන එමින් පවතින බව වාර්තා වනවා.
අද අලුයම මීගමුව සෙත්තපාඩුව වෙරළේදී නෞකාවක බහාලුම්වල සුන්බුන් තොගයක් ධීවරයෙකු විසින් නිරීක්ෂණය කර තිබෙනවා. එම සුන්බුන් කොළඹ වරායට නුදුරින් ගිණි ගනිමින් පවතින එක්ස්ප්‍රස් පර්ල් නෞකාවෙ තිබී ගිණි ගන්නා ලද බහාලුම්වල සුන්බුන් යැ'යි සැකයක් පවතින බව රාජ්‍ය අමාත්‍ය කංචන විජේසේකර මහතා පැවසුවා.
මේ වන විට තවත් විශාල සුන්බුන් තොගයක් මිගමුව වෙරළ තීරයට ගසාගෙන එමින් පවතින බවද ප්‍රදේශවාසීන් පවසනවා.
පසුගිය 20 වැනිදා ගිනි ගැනීම හටගත් නෞකාව තුළ ඊයේ (25) උදෑසන පිපිරීමක් සිදුවුනා.
මේ හේතුවෙන් නෞකාවේ ගින්න තීව්‍ර වූ අතර නෞකාවේ ගබඩා කර තිබූ බහාලුම් රැසක් මේ වනවිටත් ගිනි ගනිමින් පවතිනවා.
පිපිරීමත් සමග බහාලුම් කිහිපයක් මුහුදට ද වැටී තිබුණා.
නෞකාවෙන් යම් තෙල් කාන්දුවක් සිදුවුවහොත් විය හැකි පරිසර හානිය අවම කරගැනීම සඳහා මේ වනවිටත් කටයුතු සූදානම් කර ඇති බව සමුද්‍රීය පරිසර ආරක්ෂණ අධිකාරියේ සභාපති නීතීඥ දර්ශනී ලහඳපුර මහත්මිය පැවසුවා.
"මේ අවස්ථාව වනවිටත් ගින්න පාලනය කිරීමට පුළුවන් තත්ත්වයක නෙමෙයි තියෙන්නේ. නැවේ ඉදිරිපස කොටසින් පටන් ගත්තු ගින්න දැන් නැවේ පිටුපස කොටසටත් ව්‍යාප්ත වෙලා. ඉතාමත් අඩු සීමිත අවස්ථාවක් තමයි තියෙන්නේ මේ ගින්න පාලනය කිරීමට. නැව ඇදගෙන ගිහින් විනාශ කරන්නේ නෑ. මුහුදු කලාපය ආරක්ෂා කර ගැනීමට අවශ්‍යයි. අපි කිව්වේ මේ නැව ශ්‍රී ලංකා මුහුදු සීමාවෙන් එහාට ගෙනියන්න කියලා. මේ බහාලුම්වල නයිට්‍රික් අම්ලය මෙට්‍රික්ටොන් 25ක්, කෝස්ටික් සෝඩා සහ තවත් රසායනික ද්‍රව්‍ය රැසක් අඩංගු වෙලා තියෙනවා මේ නැවේ. රූපලාවන්‍ය ද්‍රව්‍ය සෑදීමට භාවිත කරන ද්‍රව්‍යත් තියෙනවා. ගින්න පැතිරෙන්න උපකාර කරන ද්‍රව්‍ය රැසක් මෙහි තියෙනවා. මේ නැවෙන් තෙල් විසිරීමේ අවදානමක් තියෙනවා. එහෙම වුණොත් මීගමුව ආශ්‍රිත ප්‍රදේශයට තමයි තෙල් විසිරීම යන්නේ. මේ වගේ කාලගුණ තත්ත්වයක් යටතේ නැව වටේ ආවරණ යොදලා තෙල් විසිරීම පාලනය කරන්න බෑ. වෙරළ පිරිසිදු කිරීම තමයි අපිට තියෙන විසඳුම. අපි ජනතාවගෙන් ඉල්ලන්නේ පා වෙලා එන කිසිදෙයක් අල්ලන්න එපා කියලා. එය සෞඛ්‍ය බලපෑමක් වෙන්න පුළුවන්,"යනුවෙන් ද ඇය පැවසුවාය.
