Header Ads

උණුසුම් පුවත්

මුහුදේදී අසාධ්‍ය තත්වයට පත් තවත් ධීවරයෙකු නාවික හමුදා සහයෙන් ගොඩබිමට


බේරුවලට නිරිත දෙසින් නාවික සැතපුම් 85ක් පමණ  දුරින් වු ගැඹුරු මුහුදු ප්‍රදේශයේ දී ඇතිවු හදිසි රෝගී තත්වයක් හේතුවෙන් අසාධ්‍ය වූ තවත් ධීවරයෙකු ගොඩබිමට රැගෙනවිත් ප්‍රතිකාර සදහා යොමු කිරිමට නාවික හමුදාව ඊයේ (07) කටයුතු කරන ලදී.

බේරුවල ධීවර වරායෙන් 2021 ජුනි මස 01 වන දින ධීවර කටයුතු සඳහා පිටත්ව ගොස් ඇති ධීවරයින් හය දෙනෙකුගෙන් (0‍6) සමන්විත ‘දේශි’ නැමැති බහු දින ධීවර යාත්‍රාවේ සිටි ධීවරයෙකු රෝගි තත්ත්වයක් හේතුවෙන් ඉතා අසාධ්‍ය තත්වයෙන් පසු වන බවට ධීවර හා ජලජ සම්පත් දෙපාර්තමේන්තුව විසින් නාවික හමුදා මුලස්ථානයේ පිහිටි සාගරික මුදවා ගැනීම් හා සම්බන්ධීකරණ මධ්‍යස්ථානය වෙත දැනුම් දෙන ලදි.

ඒ අනුව, එම දැනුම් දීමට වහාම ප්‍රතිචාර දැක්වූ නාවික හමුදාව, අසාධ්‍ය තත්ත්වයේ සිටි එම ධීවරයා රැගෙන ඒම සදහා ශ්‍රි ලංකා නාවික නෞකා ‘සයුර’ නෞකාව එම ධීවර යාත්‍රාව තිබූ මුහුදු ප්‍රදේශයට යොමු කරන ලද අතර, අසාධ්‍ය තත්ත්වයේ සිටි ධීවරයා වෙත ප්‍රථමාධාර ලබා දෙමින් ‘සයුර’ නෞකාව මගින් ගාලු වරායට ඔබ්බෙන් වූ මුහුදු ප්‍රදේශයට ලඟා වීමෙන් පසු, වේග ප්‍රහාරක යාත්‍රාවකට මාරු කර කඩිනමින් ගාල්ල වරාය වෙත රැගෙන විත් ප්‍රතිකාර සඳහා ගාල්ල, කරාපිටිය රෝහල වෙත යොමු කිරීමට නාවික හමුදාව විසින් කටයුතු කෙරිණි.