අධිකරණ අමාත්යාංශය මගින්, නිරෝධායන නොකල පවුලක යම් සාමාජිකයකු මියගියහොත් ඔහුගේ මළ සිරුර පී. සි. ආර් පරීක්ෂණයකින් තොරව හා පශ්චාත් මරණ පරීක්ෂණයකින් තොරව ඥාතීන්ට මුදා හැරීමේ බලය මරණ පරීක්ෂකවරුන්ට පවරා ඇත.
කළුතර ජාතික සෞඛ්ය විද්යායතනයේ අධ්යක්ෂක වෛද්ය තමර කළුබෝවිල මහතා පැවසුවේ සෞඛ්ය සේවා අධ්යක්ෂ ජනරාල්වරයා ඒ පිළිබඳ අධිකරණ අමාත්යාංශය දැනුම්වත් කිරීමෙන් අනතුරුව මේ සම්බන්ධයෙන් මරණ පරීක්ෂකවරුන්ට ලිඛිතව මේ වනවිටත් දන්වා ඇති බවයි. .
යම් පුද්ගලයකු නිවසේදී හෝ රෝහලක දී මියගියහොත් ඔහුගේ හෝ ඇයගේ මළ සිරුර පශ්චාත් මරණ පරීක්ෂණය පැවැත්වීමට පෙර පි.සි.ආර්.පරීක්ෂණ සිදු කිරීම සඳහා රෝහල්වල මෘත ශරීරාගාරවල තැන්පත් කර තිබීමෙන් මෘත ශරීරාගාරවල ඇතිවන තදබදය අවම කිරීම සඳහා මෙම පියවර ගෙන ඇත.
අධ්යක්ෂකවරයා තවදුරටත් කියා සිටියේ පුද්ගලයෙක් සැකකටයුතු අයුරින් මියගොස් තිබුනොත් හෝ සියදිවි නසාගෙන මියගොස් තිබුනොත් සුපුරුදු නීතිමය කර්තව්යයන් සිදු කරන බවත් රෝහල්වල මෘත ශරීරාගාරවල මළ සිරුරු තැන්පත් කිරීමේදී පවතින ගැටලු සහගත තත්වයන්ට පිළියමක් වශයෙන් මෙම තීරණය ගත් බවයි.
