වත්මන් ආණ්ඩුව මීට පෙර චීනය තරහා කරගත් අතර මේ වන විට රුසියාවද තරහ කර ගැනීමට කටයුතු කරමින් සිටින බව ජාතික නිදහස් පෙරමුණේ නායක පාර්ලිමේන්තු මන්ත්රී විමල් වීරවංශ පවසනවා.
ඊයේ (05) කොමියුනිස්ට් පක්ෂ මූලස්ථානයේ පැවැති ස්වාධීන පාර්ලිමේන්තු මන්ත්රී සංසදයේ විශේෂ මාධ්ය සාකච්ඡාවකට එක්වෙමින් ඔහු මෙම අදහස් පළ කළා.
එමෙන්ම එළඹෙන සැප්තැම්බර් සහ ඔක්තෝබර් වන විට ලෝකයේ ඇතිවන මහා සාගතයට මුහුණ දීමට කළ යුත්තේ කුමක්ද යන්න පිළිබඳ රජයට කිසිදු පිළිතුරක් නැති අතර රජය මෙම සියලු අර්බුද උත්සන්න වීමට ඉඩ හැර බලා සිටින බව ඔහු පවසනවා.
මන්ත්රීවරයා පෙන්වා දෙන්නේ චීනය සහ රුසියාව දිගු කාලයක් තිස්සේ ශ්රී ලංකාවට සහාය ලබා දුන් මිත්ර රාජ්යයන් දෙකක් බවත් මෙරටට පැමිණි රුසියානු ගුවන් යානයකට වාරණයක් පනවමින් එය රඳවා තබා ගැනීම හේතුවෙන් ශ්රී ලංකාවට රුසියානු සංචාරකයින් පැමිණීම සම්පූර්ණයෙන් අහිමි වන බවයි.
මෙම අවස්ථාවට පූජ්ය අතුරලියේ රතන හිමි, ශ්රී ලංකා සමසමාජ පක්ෂයේ නායක මහාචාර්ය තිස්ස විතාරණ,යුතුකම සංවාද කවය වෙනුවෙන් ගෙවිඳු කුමාරතුංග ඇතුළු පිරිසක් එක්ව සිටියා.
අපගේ WhatsApp පුවත් සේවාවට එක්වී මෙවැනි පුවත් ඔබ අතටම ලබාගන්න.
