ඊයේ (18) ආණ්ඩු පක්ෂයේ මන්ත්රී කණ්ඩායම ඒකමතිකව තීන්දු කොට ඇත්තේ බලශක්ති අමාත්ය උදය ගම්මන්පිල මහතාට එරෙහිව සමඟි ජන බලවේගය ඉදිරිපත් කොට ඇති විශ්වාසභංග යෝජනාව පරාජය කළ යුතු බවයි.
අමාත්ය උදය ගම්මන්පිල මහතාට එරෙහි විශ්වාසභංග යෝජනාව අද (19) සහ හෙට (20) පාර්ලිමේන්තුවේදී විවාදයට ගැනීමට නියමිත අතර ඡන්ද විමසීම හෙට පස්වරුවේ පැවැත්වීමට නියමිතය.
විශ්වාසභංග යෝජනාව පිළිබඳ විවාදය පැවැත්වෙන දින දෙකේ ආණ්ඩු පක්ෂයේ මන්ත්රීවරුන් සියලුදෙනාට පාර්ලිමේන්තු පැමිණීම සහ විවාදය අතරතුරේ සභා ගර්භයේ රැඳී සිටීම අනිවාර්ය කිරිමටත් තීරණය කර ඇත.
ජනාධිපති ගෝඨාභය රාජපක්ෂ මහතාගේ ප්රධානත්වයෙන් ආණ්ඩු පක්ෂයේ මන්ත්රීවරුන් ඊයේ රැස්වූ අවස්ථාවේදී තෙල් මිල වැඩිවීම සම්බන්ධයෙන් අමාත්ය උදය ගම්මන්පිල මහතා දීර්ඝ වශයෙන් කරුණු පැහැදිලි කොට ඇති අතර මේ අවස්ථාවේදී ආණ්ඩුව මෙන්ම ගම්මන්පිල ඇමැතිවරයා ද ආරක්ෂා කිරීමට නම් විශ්වාසභංග යෝජනාව පරාජය කළ යුතු බවට අදහස් පළ වී තිබේ.
සමඟි ජනබලවේගය විසින් ඉදිරිපත් කරන ලද විශ්වාසභංග යෝජනාව සම්බන්ධයෙන් මෙම සාකච්ඡාවේදී දීර්ඝ වශයෙන් සාකච්ඡාවට ලක්ව ඇති අතර මෙම අවස්ථාවේදී උදය ගම්මන්පිල මහතාට එරෙහි විශ්වාසභංග යෝජනාව ජයගැනීමට විපක්ෂයට කිසිසේත් ඉඩ නොතැබිය යුතු බවත් සාකච්ඡා වී ඇත.
අද හෙට කොළඹ ඉන්න ඕන ! ජනපති - අගමැති කියයි
මේ අතර විශ්වාසභංග යෝජනාව විවාදයට ගන්නා අද සහ හෙට කොළඹ රැඳී සිටිය යුතු බවට ජනාධිපතිවරයා සහ අගමැතිවරයා ආණ්ඩු පක්ෂයේ සියලුම මන්ත්රීවරුන් හට දැනුමිදී ඇත.
කොළඹ රැදී සිටිමින් එම දින දෙකේ විවාදයට සහභාගිවී යෝජනාව පරාජයට පත් කිරීමට උපරිම දායකත්වය ලබා දිය යුතු බවටද වැඩිදුරටත් දැනුම් දී ඇත .
